တစ်ရွာမပြောင်း သူကောင်းမဖြစ်

(၁)

ရှေ့ကိုရောက်လာတဲ့ မုန့်ထုပ်တွေကို ပိတ်ပေးဖို့ လှမ်းယူလိုက်ချိန် ရင်ထဲက တလှပ်လှပ်နဲ့။ ဒီနေ့ နေလို့ကိုမကောင်းဘူး။ မနက်စာစားပြီး ဆေးတစ်ခွက်တော့ သောက်လာပါရဲ့။ ခုချိန်ထိ လူကယိုင်ချင်တုန်း။ ပိတ်ပေးပြီးသား မုန့်ထုပ်တွေဖြန့်ဖို့ မုန့်ကန်ထဲ အလိုလိုကျနေတာကြည့်ရင်း လူက မိုက်ခနဲ တစ်ချက်ဖြစ်သွားတယ်။ အေးစက်စက်ကြမ်းပြင်နဲ့အထိ ဆူဆူညံညံအသံတွေ။ မပီပြင်ဝိုးတဝါးနဲ့။ 

(၂)

"ဟေး…လား…..မောင်…..တို့…………….ဝါး……………."

သာအေးတို့ ကာလသားတစ်သိုက် အိုးစည်၊ ဒိုးပတ် တီးသူတွေကတီး၊ ဦးရွှေရိုးနဲ့ ဒေါ်မိုး တို့အတွဲက ဟန်ချက်ညီညီနဲ့ ပျော်ရွှင်စွာ ကသူတွေကလို့ ကျုပ်တို့ ရွာရဲ့ ကထိန်ပွဲအတွက် ရွာစဉ်လှည့် အလှူငွေ ကောက်နေကြတယ်။ သူတို့နောက်မှာလည်း ရွာက ကလေးအကုန်ဝိုင်းစုလို့။ နှပ်ချေးတွဲလောင်း ညိုညစ်ညစ်တွေလည်း ပါသလို သနပ်ခါးအဖွေးသားနဲ့ဟာလေးတွေလည်း ပါတယ်။ ဆိုလိုက်ကြ၊ တီးလိုက်ကြ၊ ကလိုက်ကြနဲ့ ရွာရိုးတစ်လျှောက် လှည့်နေကြတာ ဒီနေ့နဲ့ဆို (၃) ရက်ရှိပြီ။ တစ်ရက်ပြီးတစ်ရက် ကောက်ခံရရှိတဲ့ အလှူငွေစာရင်းကို ညနေဆိုရင် ရွာထိပ်က ဘုန်းကြီးကျောင်းဝင်းထဲ မှာ လောစပီကာတစ်လုံးနဲ့ ဆယ်အိမ်မှူး ကိုမောင်ညှက်က ကြေညာပေးလေ့ရှိတယ်။ ကြေညာတဲ့အချိန် ကိုယ့်နာမည်ပါရဲ့လားလို့ နားထောင်ရင်း ဘယ်သူတွေ ဘယ်လောက်ထည့်တယ်ဆိုတာလည်း နားစွင့်ရသေးတယ်။ များများထည့်နိုင်မှ ကထိန်ပွဲမှာ မျက်နှာပန်းလှမယ်မဟုတ်လား။ ကိုမောင်ညှက်ကလည်း ကိုယ့်ရွာသူရွာသားတွေအကြောင်း နောကျေနေသူဆိုတော့ များများထည့်သူရဲ့နာမည်ဆိုရင် သူ့အသံက သူအော်နိုင်တာထက် ပိုကျယ်နေသလိုပဲ။

ကိုမောင်ညှက်ဆိုတာ ဆယ်အိမ်မှူးဖြစ်သလို ကာလသားခေါင်းဆောင်ဆိုလည်း ဟုတ်တယ်။ မရှက်တမ်းဝန်ခံရရင် သူက ကျုပ်ကို ပိုးနေတဲ့အထဲက တစ်ယောက်ပေါ့။ ကျုပ်က ဒီနှစ်နဲ့ဆို ရွာရဲ့ ကွမ်းတောင်ကိုင်ဘွဲ့ရတာ (၃) နှစ်ဆက်တိုက်ရှိပြီ။ ဒါကြောင့်လည်း ရွာက လူပျိုဖော်ဝင်စအရွယ်ကအစ လူလတ်ပိုင်းအကုန် ကျုပ်ကို ပိုးကြပန်းကြနဲ့။ ကျုပ်ကတော့ စိတ်မဝင်စားပါဘူး။ ကိုယ့်ကိုပိုးသူများတော့ သဘောကျကျေနပ်မိတာအမှန်ပဲ။ ဒါပေမယ့် ကျုပ်လို ကွမ်းတောင်ကိုင်က ဘာမဟုတ်တဲ့ သူတို့ကို ခေါင်းထဲထည့်စရာလား။ ကျုပ် ရင်ထဲ၊ စိတ်ကူးထဲမှာ ကိုဘချော တစ်ယောက်ပဲရှိတယ်။

(၃)

ကိုဘချောဆိုတာက ကျုပ်တို့ရွာကို အလှကုန်ပစ္စည်းလေးတွေ လာရောင်းတတ်တဲ့သူပေါ့။ တစ်လကို အနည်းဆုံးနှစ်ကြိမ်လာတတ်တယ်။ သူ့ဇာတိက မန္တလေးကလို့ ပြောတာပဲ။ မန္တလေးသားသာဆိုတယ် သူများတကာလို ညိုတိုတိုအသားအရောင်မဟုတ်ဘူး။ အသားလတ်လတ်၊ အရပ်မြင့်မြင့်နဲ့ ယောက်ျားပီသတဲ့ရုပ်မျိုး။ လူက ခပ်သန့်သန့်ဆိုတော့ မျက်မှန်တပ်ပြီး ဆိုင်ကယ်စီးလာရင် စတိုင်လ်က မင်းသားနဲ့ခပ်ဆင်ဆင်။ ဟန်ပန်အမူအယာလည်းကောင်းသလို စကားပြောလည်း ညက်တယ်။ သူ့ပစ္စည်းတွေက နိုင်ငံခြားကလာတယ်လို့ ပြောတာပဲ။ ဗူးပေါ်မှာ ကျုပ်တို့ မဖတ်တတ်တဲ့ စာလုံးတွေက အများကြီး။ ကျုပ်တို့အတွက် စာတွေကအရေးမကြီးဘူးလေ။ ဂရုစိုက်မနေပါဘူး။ အဓိကက စိတ်ကြိုက်ပစ္စည်းလေးတွေ ကို ဈေးသက်သက်သာသာနဲ့ ရဖို့မဟုတ်လား။ ဒီလိုပစ္စည်းလေးတွေရှိထားမှ ရွာမှာ ပွဲရှိပြီဟေ့ဆို အပျိုတွေကြား လက်မထောင်လို့ရမှာပေါ့။ သူများဆီက ငှားလိမ်းရတာ ဘယ်လောက်အောက်ကျ နောက်ကျနိုင်သလဲလို့။

xxxxxxxxxxxxxxxxxxxxxxxxxxx

ကျုပ်ကတော့ သိပ်မဝယ်ဖြစ်ပါဘူး။ ပထမ တစ်ခေါက်၊ နှစ်ခေါက် သူလာတုန်းကတော့ လက်ထဲလည်း ပိုက်ဆံလေးအဆင်ပြေတာနဲ့ ဝယ်ဖြစ်သေးတယ်။ နောက်အခေါက်တွေကျ ဝယ်စရာကိုမလိုတော့တာ။ သူပေးတဲ့ ပစ္စည်းတွေက ကျုပ်ရဲ့ မှန်တင်ခုံလို့ပြောလို့ရတဲ့ သေတ္တာဟောင်းပေါ်မှာ အပြည့်။ ထားစရာတောင်မရှိတော့လို့ တချို့ဗူးပုံစံမလှ တာတွေဆို သေတ္တာဘေးက လက်ဆွဲခြင်းထဲ ပစ်ထည့်ထားလိုက်တာပဲ။ ကျုပ်ကသာပစ်ထားတာပါ။ ရွှေမိနဲ့ အေးဘုံဆို အလကားမတ်တင်း ကျုပ်ဆီက ယူလိမ်းလို့ရတော့ လုနေကြတာများ ခြင်းတောင်းတောင် ယိုင်ယွဲ့ယွဲ့ဖြစ်နေပြီ။ ကိုဘချောကိုပြောပြတော့ အဆင်ပြေတဲ့အခေါက်ကျရင် မြို့က ခြင်းလှလှလေးတစ်လုံး ဝယ်လာပေးမယ်တဲ့။ မြို့ကခြင်းဆိုတော့ တောမှာသုံးတဲ့ လက်ဖြစ်ခြင်းတွေထက် ပိုလှမှာပဲ။ အရောင်လည်းဆန်းမှာ။ မျက်စိထဲပုံဖော်ရင်း စိတ်ကူးတော့ယဉ်မိသား။ နောက်တစ်ခေါက် ကိုဘချောလာရင် မြို့ကို အလည်ခေါ်ဖို့ စကားလေးစကြည့်ဦးမှ။ ရွာကသူများတွေ မြို့တက်ပြီးအလုပ်လုပ်နေကြလို့ မြို့အကြောင်းဆိုတာ သူတို့ပြောသမျှ ကြားဖူးတာပဲရှိတာ။ တစ်ရွာမပြောင်း သူကောင်းမဖြစ်တဲ့။ သူတို့လည်း အဲ့လိုတွေးပြီး မြို့တက်အလုပ်လုပ်တာဖြစ်မယ်။ ဟုတ်မှာပါလေ။ ရွာမှာထက်စာရင် မြို့တက်အလုပ်လုပ်တာမှ ကြီးပွားဦးမယ်မဟုတ်လား။ ကျုပ်လည်း သူတို့လိုတော့ လုပ်ချင်မိသား။

xxxxxxxxxxxxxxxxxxxxxxxxxxx

"နှင်းမြက လိုက်ချင်လို့လား။ အိမ်ကရော လွှတ်မှာလား။ မေးကြည့်ပါဦး"

"အမေ လွှတ်အောင်တော့ ကြည့်ပြောရမှာပေါ့။ ရွှေမိနဲ့ အေးဘုံတို့ကလည်း ကျုပ် နဲ့ အတူလိုက်ချင်တယ်တဲ့"

"ကောင်းသားပဲ။ သူတို့နှစ်ယောက်ပါတော့ နှင်းမြလည်း အဖော်ရတာပေါ့။ ဒါထက် နှင်းမြက ကျွန်တော်နဲ့ လိုက်ရဲလို့လား"

"အို…ကိုဘချောကလည်း..။ ကျုပ် တော့်ကို ယုံကြည်ပြီးသားပါ"

ရွှန်းရွှန်းစားစားအကြည့်တွေကြောင့် ကျုပ် ရင်တွေလှိုက်ဖိုသွားတယ်။ အသံမတုန်အောင် ထိန်းဖြေရင်း ကျုပ် နှုတ်ခမ်းတွေမှာ အပြုံးပန်းတွေဝေလို့၊ ကြည်နူးမှုတွေလည်း ရင်တစ်ခုလုံး ဖိတ်လျှံနေသလားပဲ။

(၄)

မြို့ကိုရောက်တော့ ကိုဘချောစီစဉ်ပေးတဲ့ သူ့သူငယ်ချင်းအိမ်မှာ တည်းရတယ်။ မဟာမုနိဘုရားကြီးဆိုတာ တန်ခိုးကြီးတယ်ဆိုတာ ဟုတ်မှာပဲ။ လူတွေကို စည်ကားလို့။ တောင်သမန်အင်းပေါ်မှာလည်း ဓာတ်ပုံတွေရိုက်ကြ တယ်။ ရွှေမိတို့နှစ်ယောက်က တော်တော်ကဲတယ်။ ကျုပ်ကတော့ အိနြေ္ဒထိန်းရတာပေါ့။ ကိုဘချောလည်းပါတာကိုး။ မန္တလေး  တောင်တက်တော့လည်း ကိုဘချောက အလိုက်တသိနဲ့ မောလား နှင်းမြလို့ မေးတိုင်း မမောပါဘူးလို့ပဲ ဖြေမိတယ်။ သူက ခဏခဏမေးပေမယ့် ပြန်ဖြေရတာ မောတယ်လို့ကို မထင်ဘူး။

မြို့မှာ ဘယ်နေရာကြည့်ကြည့် အဆန်းတွေချည်းပဲ။ မမြင်ဖူးတာတွေလည်းမြင်ရ။ မကြားဖူးတာတွေလည်းကြားရ။ မစားဖူးတာတွေလည်း စားရနဲ့။ အမေ့ကိုခေါ်ပြီး နောက်တစ်ခေါက် ထပ်လာရမယ်။ အမေ့မျက်စိကိုလည်း မြို့တက်ပြီး ဆေးခန်းပြ၊ ခွဲသင့်ရင်ခွဲလို့ ကိုဘချောကအကြံပေးတယ်။ အမေက မျက်လုံးမကောင်းတော့ဘူးလေ။ အစစ အရာရာ သူကူညီမယ်လို့လည်း ပြောရှာတယ်။ ဒါပေမယ့် မြို့က ဆေးရုံ၊ ဆေးခန်းတွေက ဈေးကြီးပေးရတယ်လို့ ကြားဖူးတယ်။ ဘာပဲဖြစ်ဖြစ် ကိုဘချောရှိတာ ကျုပ်အတွက်တော့ ရွှေတောင်ကြီးရှိသလိုပါပဲ။

နောက်ပြီး မြို့မှာသာ အလုပ်လုပ်ခွင့်ရရင် ဘယ်လောက်ကောင်းမလဲလို့ ကျုပ် တွေးကြည့်တယ်။ ရွာက ဖိုးတုတ်တို့ ထွန်းအောင်တို့ဆိုလည်း လ္ဘက်ရည်ဆိုင်မှာ ဝိတ်တာဆိုလားပဲ။ စရိတ်ငြိမ်း၊ လစာလည်းပေးတယ်တဲ့။ ဟုတ်မှာပါ။ သူတို့ ရွာပြန်လာရင် ဝယ်လာတဲ့လက်ဆောင်တွေက အများသား။ မိလုံးဆိုလည်း အိမ်ကောင်းကောင်းမှာနေရတယ်တဲ့။ တစ်အိမ်လုံး သူ့ခြေသူ့လက်ဆိုပဲ။ သူပြန်လာတဲ့အခါတိုင်း ဝတ်လာတဲ့ အဝတ်အစားတွေကလည်း အဆန်းတွေချည်းပဲ။ ဒီကိစ္စကိုလည်း ကိုဘချောကိုပဲ တိုင်ပင်ကြည့်ရမယ်။

 

(၅)

ဒီစက်ရုံက ကျုပ်တို့အလုပ်လုပ်ရမယ့်နေရာဆိုပဲ။ စက်ရုံကြီးကလည်းအကြီးကြီး။ ဟိုနားကလူတွေက ဘယ်သူ့ကိုရပ်စောင့်နေတာလည်း မသိဘူး။ ဒီဘက်ကြည့်တော့လည်း အဲ့လိုရပ်နေတဲ့သူတွေ အများကြီး။ မနေနိုင်လို့ ဘေးကအဖော်ကို မေးကြည့်တော့မှ စက်ရုံစောင့်တွေဆိုပဲ။

ကိုဘချောကို မြို့မှာ အလုပ်လုပ်ချင်တဲ့အကြောင်း၊ အမေ့အတွက် ခွဲစိတ်စရိတ်လည်း များများရှာချင်တဲ့အကြောင်း ပြောပြတော့ နိုင်ငံခြားကစက်ရုံတစ်ရုံမှာ အလုပ်လုပ်ရင် မြို့မှာလုပ်တာထက်တောင် ပိုရဦးမယ်။ သိပ်လည်းမပင်ပန်းဘူးတဲ့။ ပိုက်ဆံကလည်း ဘတ်ငွေဆိုလားပဲ။ ငွေပို့ရင် တော်တော်ကျန်တယ်ဆိုပဲ။ သူပြောတဲ့ ဘတ်ငွေတွေ ဘာတွေ ကျုပ် မသိပါဘူး။ နားလည်းမလည်ဘူး။ ကျုပ် သိတာက ပိုက်ဆံများများရရင် အမေ့ကို ခွဲစိတ်ပေးမယ်။ ကျုပ်သုံးချင်တဲ့ အလှကုန်ပစ္စည်းတွေလည်း ရှယ်သုံးလို့ရမယ်။ မိလုံးလိုလည်း အဝတ်အစားဆန်းဆန်းလေးတွေ ဝတ်နိုင်မယ်။ ဒါနဲ့ပဲ အမေ့ဆီ လှမ်းအကြောင်းကြားပြီး သုံးယောက်သား ဒီစက်ရုံရောက်လာတယ်ဆိုပါတော့။ အမေကတော့ ဘယ်သဘောတူမှာလဲ။ တတ်နိုင်ဘူးလေ။ တစ်ရွာမပြောင်း သူကောင်းမဖြစ်ဆိုတာ ရှိတယ်မဟုတ်လား။

xxxxxxxxxxxxxxxxxxxxxxxxxxx

စက်ရုံရောက်တော့ သူတို့ပေးတဲ့ ယူနီဖောင်းဝတ်၊ သူတို့ကျွေးတာစားပြီး မိုးလင်းမိုးချုပ် လုပ်ရပြန်တယ်။ မပင်ပန်းပါဘူးလို့ ပြောခဲ့တဲ့ ကိုဘချောမျက်နှာကြီးကို မြင်ယောင်လာတိုင်း စိတ်ရှိလက်ရှိ ဆွဲရိုက်ပစ်ချင်တယ်။ ကျုပ် သူ့ကို ယုံခဲ့မိလို့၊ အားကိုးလွန်းခဲ့လို့ ခုလိုဘဝမျိုးမှာနေရတာ။ အမေသာသိရင် ဘယ်လောက်ရင်ကျိုးမလဲ။ တစ်လတစ် ခြစ်ခြုတ်ပြီးမစားရက် မသောက်ရက် စုနိုင်လို့သာ ရွာကိုပြန်ပို့နိုင်တာ။ ကျုပ်က ရွာမှာဆို ဘာတစ်ခုမှ ပင်ပင်ပန်းပန်း လုပ်ဖူးတာမဟုတ်ဘူး။ ခုလို အစားအသောက်ဆင်းရဲ၊ စိတ်မချမ်းသာနဲ့ ရောက်တာမှမကြာသေးဘူး။ ကျန်းမာရေးက ချူချာလာတယ်။ ကျန်းမာရေးမကောင်းပေမယ့် နားလို့ကလည်းမဖြစ်ဘူး။ တစ်ရက်ပျက်တာနဲ့ လစာထဲက တန်းနှုတ်တာပဲ။

 (၆)

ဒီနေ့လူကနေလို့မကောင်းဘူး။ ရင်ထဲတလှပ်လှပ်နဲ့ မောနေတယ်။ မနက်စာလည်း နည်းနည်းပဲစားနိုင်တယ်။ လူကနုံးချိနေပြီး ခြေတွေလက်တွေတောင် မသယ်ချင်ဘူး။ ခေါင်းထဲကလည်း တရိပ်ရိပ်နဲ့။ လကုန်ရက်နီးပြီဆိုတော့ ခွင့်လည်းမယူချင်ဘူး။ ပြီးခဲ့တဲ့လကလည်း အဖြတ်ခံရသေးတယ်။ ဒီတစ်လ အပြည့်ရမှဖြစ်မယ်။ နေမကောင်းတော့ ကြာကြာရပ်နေရတဲ့ ဒူးတွေ ညွှတ်ချင်ချင်ဖြစ်ဖြစ်သွားတယ်။ မုန့်ထုပ်တွေကတော့ ရွှေမိနဲ့အေးဘုံတို့ဘက်ကနေ ကျုပ် ရှေ့ကို ဟောခနဲ ဟောခနဲ။ ရှေ့ရောက်လာတဲ့ မုန့်ထုပ်တွေကို ပိတ်ပေးဖို့က ကျုပ်တာဝန်။ ပိတ်ပေးပြီးရင် တစ်ဘက်က မုန့်ကန်ထဲကို တွန်းပို့ပေးလိုက်ရုံပဲ။

မုန့်ထုပ်တွေကလည်း တဖွဲဖွဲနဲ့။ ဟော…လာပြန်ပြီတစ်ထုပ်။ ပိတ်ပေးဖို့လှမ်းအယူမှာတင် ကမ္ဘာကြီး အိုးထိန်းစက်လို လည်သွားတယ်ထင်ပ။ ကျုပ် အသိစိတ်တွေ လွင့်မျောလို့။ အာရုံထဲမှာတော့ အမေ၊ ရွှေမိ၊ အေးဘုံနဲ့ ရွာက သာအေးတို့တွေ တလှည့်စီ။

(၇)

နှာခေါင်းထဲဝင်လာတဲ့အနံ့တွေက ဆိုးလိုက်တာ။ ဘာနံတွေပါလိမ့်။ မျက်လုံးဖွင့်ကြည့်လိုက်တော့ ရွှေမိနဲ့ အေးဘုံတို့ရဲ့ စိုးရိမ်မှုအပြည့်နဲ့ မျက်နှာတွေ။ မျက်နှာပေါ်တည့်တည့်မှာက ပန်ကာတစ်လုံး။ ညာဘက်လက်ကို လှုပ်ကြည့်လိုက်တော့ မျက်နှာပေါ်က ဆေးပုလင်းရမ်းသွားတယ်။ အနံ့တွေကလည်း ဆေးနံ့တွေ။ ဒါဆို ဆေးရုံပေါ့။

"နှင်းမြ… သက်သာရဲ့လား"

ရွှေမိအမေးကို မျက်လုံးမှိတ်ပြီးပဲ အဖြေပေးနိုင်တယ်။ ခေါင်းတစ်ခုလုံးလည်း လှုပ်လို့မရသလို နှုတ်ခမ်းတွေလည်း ခြောက်လိုက်တာ။ တော်သေးတယ်။ အေးဘုံက အလိုက်တသိနဲ့ နှုတ်ခမ်းကို ရေစွတ်ထားတဲ့ဂွမ်းဖတ်နဲ့ တို့ပေးတော့မှ ခပ်စိုစိုလေးနဲ့ နေလို့ကောင်းသွားတယ်။ ခုလိုချိန်မျိုး ဘေးနားမှာ အမေရှိရင် ဘယ်လောက်ကောင်းမလဲ။ အမေ့ပြောစကားကို နားမထောင်ခဲ့တဲ့ ကျုပ် ခုမှ အမေ့ကို တမ်းတရင်း ငိုမိပြန်တယ်။

"ညည်းကလည်း မငိုပါနဲ့အေ။ လူကအားရှိတာလည်းမဟုတ်ဘူး…။ သက်သာသလိုနေမှပေါ့"

ရွှေမိကပြောရင်းနဲ့ စီးကျလာတဲ့ မျက်ရည်တွေကို သုတ်ပေးတယ်။ ကျုပ်ဘေးမှာ သူတို့နှစ်ယောက်ရှိနေလို့သာပေါ့။ မဟုတ်ရင် ဒီလိုအချိန် သူများနိုင်ငံမှာ ဘယ်လောက်စိတ်ဆင်းရဲရမလဲ။

"ကျုပ်တို့ စက်ရုံခဏပြန်ပြီး ညည်း အခြေအနေကို သွားပြောလိုက်ဦးမယ်။ ခွင့်တစ်ပတ်လောက်ပေးဖို့လည်း စက်ရုံမှူးကို ပြောခဲ့မယ်"

သူတို့နှစ်ယောက်ထွက်သွားတော့မှ ဗိုက်ထဲက ဆာလာသလိုလို။ ပြန်လာကြရင်တော့ ကျုပ်အတွက် စားစရာတစ်ခုခု ပါလာမယ်ထင်ပါရဲ့။ ခန္ဓာကိုယ်ကသာ ငြိမ်နေရတာ၊ စိတ်တွေက မငြိမ်နိုင်ဘူး။ ဆေးရုံစရိတ်က ဘယ်လောက်များ ကျမှာပါလိမ့်။ ခွင့်ကလည်း တစ်ပတ်ဆိုတော့ လစာထဲက ဘယ်လောက်တောင် ဖြတ်ခံရမယ်မသိဘူး။ ဒီတစ်လတော့ စုမိဖို့ မပြောနဲ့။ လစာလေးကျန်ရင်ကံကောင်း။ အမေကတော့ လစဉ်ပို့ငွေလေး မျှော်နေရှာမှာ။  အမေ့မျက်စိလည်း ဘယ်လိုနေလဲ မသိဘူး။ ပိုက်ဆံပြည့်ရင်တော့ ခွဲပေးနိုင်ပါပြီ အမေရယ်။

တစ်ရွာပြောင်းပြီး သူကောင်းဖြစ်ချင်တဲ့ ကျုပ်၊ ခုတော့ သေချင်တဲ့ကျား၊ တောပြောင်းသလိုများ ဖြစ်နေသလား မပြောတတ်တော့ပါဘူးအမေရေ။

ဂျွန်မိုး

14062012 (THU)

7:52 PM